Psalms 18

Kumqondisi wokuhlabela. ElikaDavida inceku yeNkosi. Wahlabelela uJehova amazwi engoma le lapho uJehova ayemkhulule esandleni sezitha zakhe zonke lasesandleni sikaSawuli. Wathi:

1Ngiyakuthanda, O Jehova, mandla ami.

2UJehova ulidwala lami, inqaba yami, lomkhululi wami; uNkulunkulu wami ulidwala lami, ngiphephela kuye. Uyisihlangu sami lophondo lokusindiswa kwami, inqaba yami.

3Ngiyambiza uJehova, ufanele ukudunyiswa, ngikhululwe ezitheni zami.

4Izibopho zokufa zangihilela; izikhukhula zokubhubhisa zangigabhela.

5Izibopho zengcwaba zangithandela; imijibila yokufa yaqondana lami.

6Ekukhathazekeni kwami ngamemeza kuJehova; ngakhala kuNkulunkulu wami ngicela usizo. Walizwa ilizwi lami esethempelini lakhe; ukukhala kwami kwafinyelela kuye, ezindlebeni zakhe.

7Umhlaba wathuthumela wazamazama, lezisekelo zezintaba zanyikinyeka; zathuthumela ngoba wayezondile.

8Kwathunqa intuthu emakhaleni akhe; umlilo ohangulayo waphuma emlonyeni wakhe, amalahle avuthayo alavuka kuwo.

9Waqhekeza amazulu wehlela phansi; ngaphansi kwezinyawo zakhe kulamayezi amnyama.

10Wakhwela phezu kwekherubhi waphapha, wantweza emaphikweni omoya.

11Wenza umnyama isembeso sakhe, isigubuzelo sakhe kwaba ngamayezi ezulu amnyama asemkhathini.

12Phakathi kokukhazimula kobukhona bakhe kwaqubuka amayezi, kulesiqhotho lezikhatha zombane.

13UJehova wakhalima esezulwini; ilizwi loPhezukonke lavimbanisa indawo.

14Waciba ngemitshoko yakhe wahlakaza izitha, izikhatha zombane ezinkulu zabalalisa ucaca.

15Izigodi zolwandle zavela egcekeni, lezisekelo zomhlaba zachayeka lapho usukhwaza, wena Jehova ngomfutho wokuphefumula kwamakhala akho.

16Welula isandla sakho usezulwini wangibamba wangihlenga enzikini yamanzi.

17Wangilamulela esitheni sami esilamandla, ezitheni zami ezazingigabhela ngamandla.

18Zangijamela mhla ngisebunzimeni, kodwa uJehova waba yinsika yami.

19Wangikhupha wangibeka endaweni ekhamisileyo wangihlenga ngoba wayethokoza ngami.

20UJehova ungenzele okulingene ukulunga kwami; ungivuze ngokwanele ukuhlanzeka kwezandla zami.

21Ngoba ngizigcinile izindlela zikaJehova; angenzanga okubi ngokufulathela uNkulunkulu wami.

22Yonke imithetho yakhe iphambi kwami; angizifulathelanga izimemezelo zakhe.

23Ngibe ngilokhu ngimsulwa phambi kwakhe njalo ngisixwayile isono.

24UJehova ungivuze ngokwanele ukulunga kwami, ngokufanele ukuhlanzeka kwezandla zami njengokubona kwakhe.

25Kwabathembekileyo lawe uthembekile, kwabamsulwa lawe umsulwa.

26Kwabahlanzekileyo uziveza uhlanzekile, kodwa kwabangaqondanga uziveza ukhaliphile.

27Usindisa abathobekileyo, kodwa ubehlise labo abamehlo asesiphundu.

28Wena, O Jehova, gcina isibane sami sibhebha; uNkulunkulu wami uphendula umnyama wami ube yikukhanya.

29Ngosizo lwakho ngingaphuma ngimelane lebutho lempi; ngoNkulunkulu wami ngingaweqa umduli.

30UNkulunkulu yena indlela yakhe iphelele; ilizwi likaJehova kalilansolo. Ulihawu labo bonke abaphephela kuye.

31Ngoba ngubani uNkulunkulu ngaphandle kukaJehova? Njalo ngubani oliDwala ngaphandle kukaNkulunkulu wethu na?

32NguNkulunkulu ongihlomisa amandla enze indlela yami iphelele.

33Wenza izinyawo zami zibe njengezempala; ungenza nganelise ukuma eliweni.

34Ufundisa izandla zami ukulwa impi; izingalo zami zingaligoba idandila lethusi.

35Wena uyanginika isihlangu sakho sokunqoba, lesandla sakho sokunene siyangiqinisa; uyazehlisela phansi ukuze ungenze ngibe mkhulu.

36Uyayiqhelisa indlela enginyathela kuyo, ukuze izinqagala zami zingapheci.

37Ngaxotshana lazo izitha zami ngazifica; kangibuyanga ngingakazibhubhisi zonke.

38Ngazichoboza ukuze zingavuki futhi; zawa phansi kwezinyawo zami.

39Wena wangihlomisa ngamandla okulwa impi; wenza abaxabana lami bakhothama ezinyaweni zami.

40Wenza izitha zami zafulathela zabaleka, njalo ngazibhubhisa izitha zami.

41Bakhala becela uncedo, kodwa wayengekho owayengabalamulela kuJehova, kodwa kaphendulanga.

42Ngabatshaya ngabachola baba njengothuli luphetshulwa ngumoya; ngabathululela emigwaqweni njengodaka.

43Usungikhulule ekuhlaselweni yilababantu; usungenze ngaba yinhloko yezizwe; abantu engangingabazi sebebuswa yimi.

44Bathi bangezwa engikutshoyo bangilalele; abezizweni bayatshotshobala phambi kwami.

45Bonke baphela amandla, beze begedezela beqhamuka ezinqabeni zabo.

46UJehova uyaphila! Alidunyiswe iDwala lami! Makaphakanyiswe uNkulunkulu uMsindisi wami!

47UnguNkulunkulu ongiphindiselelayo, onqoba izizwe zibe ngaphansi kwami,

48ongisindisayo ezitheni zami. Wena wangikhuphula ngaphezu kwezitha zami; wangihlenga ebantwini bodlakela.

49Ngakho ngizakudumisa phakathi kwezizwe, O Jehova; ngizahlabelela indumiso yebizo lakho.

50Upha inkosi yakhe ukunqoba okukhulu; utshengisa umusa ongaphuthiyo kogcotshiweyo wakhe, kuDavida kanye lezizukulwane zakhe kuze kube nininini.